الأحد، 26 أغسطس 2007

بين المفتى والمستفتى ...ضعنا


أولا العنوان كده يخض ..لكن فعلا ضعنا..

فى العالم العربى وفى مصر تحيدا امشى فى أى حته هتسمع فتوى ..

لأ وفتاوى جامده كمان ..

بداية رحلتى مع الفتاوى عمرها طوييل ..من ابتدائى تقريبا من الزميله التى قالت

ان الحركات المسموح بها فى الصلاه أربعه ..مين قال يا فلانه ؟

والاجابه المعتاده :سمعت

بعدين اتضح لى ان هذه المره لن تكون الأخيره ..

ومن أيام ان اللى تحت الأربعين لايصح له حج ...وعلى هذا فالحجه التى حججتها وأنا فى الثالثة عشره

لاتصح ...

واستمرى يا رحلة الفتاوى ..

كبرت وعرفت ان سبب مانحن فيه جهل نعم جهل بكل الآداب التى وضعت للفتوى..

وسأركز على شئ محورى نعانى منه هذه الأيام

لا يرد المفتى على سائل ليس غرضه الحق ..

يعنى السائل اذا لم يكن يسأل لغرض ابراء الذمه وصيانة دين الله فلا يجب الرد

وقاعده أخرى تعريف السائل المذاهب الأخرى

الفكره الأولى بعض السائلين يسألون لأغراض أخرى ويثيرون قضايا ليست بذات بال أبداا

مره من المرات أثيرت قضيه لايمكن لعاقل تخيلها ..

ماهو حكم الديسكو الاسلامى نعم كما قرأت

والأدهى ان الساده المنتسبين للعلم الشرعى يختلفون حرام ..والآخر حلال ومفيش حاجه بعد كده

لو سئل هذا المفتى عن حكم تزوير ارادة الشعوب أو حكم تعبيد الأحرار لما سمعت له حسا ..ولدعوت له بالدعاء المعروف لاأسكت الله حسك.

وفهمت لأول مره أنه ربما يكون الهدف من ذلك الطوفان من الفتاوى الذى نعيش فيه سببه وهدغه الرئيسى اشغال الشعوب فى أمور من التوافه حتى تبتعد عن الملمات ..

انشاء جيل من المفتين همه الأكبر مسائل وقضايا ليست من صميم الاسلام ..

الاسلام الذى قال عنه الامام الشهيد حسن البنا الحرية فريضة من فرائضه ..وليس ذلك الاسلام المدجن الذى يركن فى غرفة النوم وفى الجامع ..

الاسلام العظيم الذى بنى أعظم الدول فى التاريخ ..

دين المروءة والفضيله..

فى ذلك البرنامج ..اياه ..الذى أعده من أعمدة تغييب الوعى عن الأمه سئل هذا السؤال ومعذرة من ذوى القلوب الصلبه لأن السؤال موجه لأصحاب القلوب الرحيمه..

قطه تلد كثيرا هل يجوز اجراء عملية تعقيم دائم لها ؟؟؟؟

والسؤال منقول بنصه بدون تحريف..

سؤال كهذا يجب أن يؤدب سائله لا أن يرد عليه

كيف يطرح سؤال مثل هذا أصلا؟؟

وكانت الاجابه أن الأمر متروك لجمعيات حقوق الحيوان

يظهر أن الدكتوره تعرف حد فى الجمعيات دى توصيه بالقطه أحسن غلبانه وصاحبة عيال...

المهم طرحت نفس السؤال فى ورقه طبعا على أستاذ الفقه المقارن فى الكليه ..كان يدرسنا مادة القضايا المعاصره راحت له الورقه وأنا أجلس فى الصف الأول وأعطيتها لبنات ورا عشان ما يعرفش مين اللى سأل ..

ورأيت ردة فعله عندما قرأ الورقه..

طبعا افتكرها نكته وضحك كده وقفل الورقه تانى ِ

فكره ما يوصلش ان فيه حد يسأل السؤال ده بجدالا لو بيستهبل
ودا المفروض اللى كانت الدكتوره تعمله ..
هنسأل عن القطط ..والبنى آدمين ..يعنى الله المستعان
وطبعا المشاهدين المخلصين للبرنامج أثنو على اجابات الدكتوره فى البرنامج ..
والمذيع طبعا ..ولا بلاش احنا داخلين على رمضان والواحد لازم يلم لسانه
برامج كهذه البرامج هى السبب فيما نحن فيه الآن
وأختم هذا المحور بقول الامام مالك لمن سأله عن حكم من قال لأخيه يا حمار قال يؤدب
فتمادى الرجل وقال فلو قال يا حصان قال ..تؤدب أنت
أحاول اكمال البقيه قريبا واعذرونى على الأسلوب لأنى مخنووووووووقه فعلا ...

الأربعاء، 15 أغسطس 2007

تاج من الغاليه طموح ..

وصلنى هذا التاج من أبله أمل أولا ثم من طموح ثانيا..
وربنا يعينى بقى لأنى بكره الأسئله عقد الامتحانات بقى ..مع انها عدت
أحب شخص لقلبك فى الدنيا؟
أبى الغالى _رحمة الله عليه_،ماما ..محمد أخويا ..ميمونه أختى وسيودى _ابنها _ أبله أموله.. أنا طبعا لأن دا شئ طبيعى انى أحب نفسى..

انسان مستعد تضحي بحياتك – ركز فى كلمة حياتك - عشانه؟

عبد الله عزام رحمة الله عليه ..استشهد وأنا عمرى شهور قليله ..بصراحه أتمنى الآن وده مش زهق من الدنيا ولا حاجه أنى لم أولد وأخذ هو عمرى كله من بدايته وحتى النهايه.. لو انسان عايش يبقى أكيد أى علم ربانى يخلص للأمه..الشيخ محمد الحسن الشنقيطى ..ده عاااااالم بجد
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

مفيش حد نهاااائى ..أفضل انى أقول ربنا يهديه ...
.ما هو:اسم أجمل كتاب كتبه بشر قرأته ومحتفظ به حتى الان؟
هى كتب كثيره راااائعه لكن على رأسها كتاب أحتفظ بيه من اولى اعدادى..على أرض القهوه البرازيليه..جوله فى أوضاع المسلمين فى جنوب البرازيل للأستاذ محمد بن ناصر العبودى ..والرجل أعده المؤسس لأدب الرحلات فى العصر الحديث ..ولى عن الكتاب كلالالام كثير ليس هذا مقامه..
اسم كتاب -كتبه بشر برضة- انت متعلق بيه وبتقرأه كل فترة؟

ثلاثية ابن الجوزى ..صيد الخاطر..الأذكياء..أخبار الحمقى والمغفلين
..كتاب سمير الهضيبى الأكثر من رااائع..رسائل من السجن فى الحب والسياسه
..ثلاثية الزمن القادم
..كتاب الفن والانسان
اهم جهاز منزلى انت متعلق بيه او بتستخدمه كتير؟

التلفزيووووووون...صندوق ابليس كما يحلو لى أن أسميه..وطبعا طبعا حبيب قلبى مسجلى الرااائع الأسود
شىء تحس بالراحة النفسية عندما تنظر اليه؟

الوجوه المؤمنه تلك التى تغلفك بطهارة ونقاء رائعين..الكعبه بطبيعة الحال..
مكان تحس فيه بالحنين الى شىء لا تدرى ماهو و ذكريات جارفة الى لاشىء؟


هناك مكان رائع فى أحد أركان المسجد النبوى ...كنت أستمع فيه الى شرح لصحيح الترمذى عندما نزور المدينه ..المكان والدرس والشيخ عبد المحسن العباد أشياء رائعه عندما تجتمع.. أحن الى طمأنينتى وأنا أجلس هناك..أما الشئ الذى لاأدرى ماهو والذكريات الجارفه الى لا شئ فأنا حاسه ان اللى كتب الكلام ده عنده أزمه..أو كان عنده أزمه..لأن المكان الوحيد اللى يستاهل الكلام ده هو الجبل اللى كان مستعد ينط منه وبعدين تداركته رحمة ربنا ..أرجوكم محدش يفهمنى غلط
مكان تحس بالراحة عندما تدخله؟
اى مسجد على وجه الأرض ..بلا اسثنااااء
اجمل مدينة زرتها داخل مصر؟

هو مش زرتها بس أنا بروحها كتييير بس بحبها جدا جدا جدا ..المحلة ..أيوه بجد المحله ..المنصوره جميله وراائعه بس المحله أحلى..
أجمل مكان طبيعي رأيته داخل مصر ؟

نيل المنصوره فى الصباح الباكر ..روقااااااااان
شخصية كارتونية بتحبها؟

توم بس توم مش بحب جيرى لأنه فار ومعفن..همتارو
نوع هاتفك المحمول؟
نوكيا 6610 الخايب
سرعة بروسيسور جهازك؟
ايه ده ؟؟؟؟؟
حجم ذاكرة –هارد- جهازك؟

نفس الاجابة السابقة
المساحة التى تشغلها المواد الاسلامية على جهازك؟

أنا أكتر واحدة محملة أناشيد......بس ؛ ومعرفش فعلا المساحة
نفس المساحة السالف ذكرها فى قلبك -الاجابة لنفسك عشان الرياء يا اخواننا -؟
الاجابة لنفسى .... يارب ارزقنى الاخلاص
أهم هدف انت واضعه لحياتك الآن؟
اكتساب خبرات لمجال عملى القادم ...تصميم الأزياء.. ومعذرة لدارسى الشريعه الزملاء
مواصفات فتى الأحلام بالنسبة لك؟

ايه ده؟؟؟ التاج ده فيه حاجات غريبه أوى
.صف ما يأتى:شعورك لما بتسمع كلمة مصر ؟
بفتكر قصيده رااائعه لنزار قبانى اسمها خاتم مصر خاصة هذه الكلمات..يا مصر بطاقة عرسك بيدى هل تسمحين لى أن أكون شاهد زفاف
شعورك لما بتسمع كلام عن اليهود؟

عادى "ان تكونوا تألمون فانهم يألمون كما تألمون وترجون من الله مالا يرجون"
شعورك لما بتشوف ظابط شرطة؟

فى الأغلب بفتح شنطتى أتأكد ان البطاقه موجوده ..يعنى الواحد مش ناقص اشتباه ..وكفايه عليه النقاب يعنى هيعمل فيه ايه لو ملقاش البطاقه ..هوده الشعور باختصار ..اللهم عدى المره دى على خيييير
شعورك لما بتشوف الكناس العجوز فى الطريق؟

فى السعوديه كان فى أنشوده اسمها ياعامل النظافه أنت لنا صديق...لكن فى مصر بيتهيألى عامل النظافه وخصوصا لو كان عجوز يبقى يا عامل النظافه أعانك الله ...كفايه عليه البهدله اللى بيشوفها من كلاب السكك اللى هنا..ببقى نفسى أروحله وأقولله انت حاجه كبيره قوى حتى لو ماكناش مقدرين قيمتك..
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

أحب هذه الصوره جدا...لكن ماوراء الصوره..الله أعلم
احساس يراودك فى اشارة مرور مغلقة بسبب مسئول كبير؟

بفكر ان ياما ناس قفلوا اشارات قبله وهما فين دلوقتى ؟؟؟الله المستعان
وانتهى التاج وبيتهيألى معدش حد ماجاوبش عليه..
وشكرا يا طموح يا غاليه..