الجمعة، 3 يونيو 2011

"رحمها الله "

منذ أيام كنت فى كورس التفصيل والخياطة - اللى محضرتش منه غير 4حصص :)
كنا بنتكلم عن قصة معينة لحردة الرقبة ..
وكانت معانا أخت سلفية باين طبعا انها سلفية ..
بتتكلم بتلقائية شديدة فقالت زى فستان سعاد حسنى الله يرحمها ..
كلمة - الله يرحمها - لم تخرج بخروج النفس كما نفعل أحيانا ..بل خرجت قريبة من النفس..
..
وبين - رحمها الله - و-عليها من الله ماتستحقه - تكمن قناعاتنا بقول رسول الله "أليست نفسا ؟؟"
الرغبة فى الهداية ..النجاة ..الجنة لللآخرين مهما أساؤوا ..
الإيمان بأن الرحمة بيد الله وحده ..واننا لا نملك صكوكا للجنة وقعت بأسماءنا من قديم ..
وأن العابد أحبط عمله بكلمة واحدة "والله لا يغفر الله لفلان "
معان نحتاجها كثيرا ..
للعاملين فى حقل الدعوة .."وما أرسلناك إلا رحمة للعالمين " ..


الأحد، 29 مايو 2011

أمنيات صباحية ..

نفسى..
نفسى أروح المسجد الصبح॥بعد الشروق بساعه...
وأكون لسه بحفظ فى سورة الرحمن...
ولسة عندى سبع سنين...
ولسه بقرأ فى حديث عيسى بن هشام...

نفسى أركب مرجيحه...بس مش تبقى عاليه॥عشان بخاف !
نفسى ألعب فى الصلصال تانى وأعمل جنينة حيوانات زى مابابا كان بيعمللى زمان...وأجيبلها قفص :)
نفسى أجيب كل أعداد فلاش ودنانير وأقعد تحت ترابيزة بيتنا اللى فى البلد وأقرأهم ..

نفسى أعرف أنام فى أى وقت زى زمان ...بقالى كتير مش بعرف أنام إلا لما أكون جبت آخرى خلاص :(
نفسى أبقى إنسان لطيف فعلا من جوه ...مش من بره بس ..
نفسى أعامل الناس كويس عشانهم هم مش عشان ربنا وخلاص ..
نفسى أحب عصير القصب ..طول حياتى بكرهه !!

عايزة أفضى موبايلى خالص ..كل الصور والرسائل والذكريات المفرحة والمتعبة على حد سواء ..
مايبقاش فيه غير 10أسماء بس ..و3أناشيد !
عايزة أخرج مع ماما لوحدنا ونروح الحسين :(

عايزة أقعد فى بيتنا عالأقل 3شهور من غير خروج خالص ..ممكن أروح المسجد مرة ولا مرتين ..أنا تعبت من الخروج والبهدلة فعلا ..
عايزة أروح بيتنا اللى فى المنصورة أجيب عبايتى الموف والمج البرتقانى بتاعى وأحط كباية الشاى فى الشباك زى زمان ..
عايزة أروح التحفيظ بتاع مسجد التقوى وأشوف بناتى وصلوا لفين فى الحفظ ..
عايزة أقعد مع أصحابى ونجيب كشرى ونحش فى الناس :)

عايزة أعمل فطاير فى مطبخ بيتنا اللى فى المنصورة ..فطاير وبيتزا وماما تبقى قاعدة برا بتحشى خلية النحل ..
عايزة أقابل محمد أخويا وهو رايح السوق وأغلس عليه وأقوله هاتلى شوكولاتة ..
عايزة أقف أستنى محمد فى البلكونة وهو راجع من صلاة الفجر ..
وأكلم أمل على سكايب الصبح ..
وأخرج مع إيمان ونروح شارع بوابة الجلاء ..

..
وما نيل المطالب بالتمنى ..
:(


الاثنين، 21 فبراير 2011

أتمنى أن
فى هذا الشهر ..
أقرأ بذاك الشغف القديم
أعود لحالة الطلب من جديد "طلب العلم "أعنى
أتعلم تجويد ॥كعلم مش كتطبيق لأن التطبيق موجود
أراجع حجابى وأوصل لقرار :(
أتقن أنواع حلوى جديدة :)
أوصل لرأى حاسم وقاطع فى أمور
أحول اصول فقه ولا لأ؟
....؟
بعض الأحكام الشرعية التى أتعامل معها يوميا

..