الأربعاء، 25 أغسطس، 2010

رمضان ..خواطر متفرقات ..

السلام عليكم ..

أول مرة أسلم ॥صح ؟؟

يلا كله بثوابه ..

لا أحب الكلام ثقيلا فى رمضان ..أحبه خفيفا ..

مجرد أضواء قصيرة ....

اليوم 15 رمضان ..الله المستعان ..

عايزة شدة ودن لحاجة أنا عارفاها كويس ..

أحتاج تدبر أكثر لأشياء كثيرة ..

مازالت سورة يوسف معى فى الجدول ..وأسلوب الظلال الذى يدق الأبواب المغلقة

....عباية رمضان ..

والله حاجة لذيذة إن بنات المنطقة اللى حواليا على الأقل بطلوا اللبس بتاع "كمال الأجسام " ولبسو عبايات ..

ودى ظاهرة جدا ..يارب ماتبقاش مؤقتة ..

رمضان فرصة لإتخاذ القرار ..سواء فى طاعة ..فى دراسة ..أو فى حجاب ..

من 8 أعوام اتخذت قرار ارتداء الخمار ..فى 25 رمضان على ما أذكر ..

الحاجة الماتعة فى الأمر إن البنات طلعوا عارفين إن لبسهم ماينفعش يقابلوا بيه ربنا ..يعنى المشكلة مش جهل

.....عمو خالد والتراويح ..

مسجدى الذى أصلى فيه التراويح يتعاقب عليه 6 أئمة ..

ولا حرم مكة ..

المشكلة بقى إن عمو خالد بس هو اللى بيلقى الدرس ..

ماما جات معايا مرة قالتلى ايه التشتت والضياع ده ؟؟

ماما أسلوبها أكاديمى شوية ..حتى دعويا يعنى مشايخ قناة...وقناة ...مايمشوش معاها بأى شكل ..

فى درس واحد ..حديث حق الله على العبيد

الربا

الختان

زكاة الفطر

آه افتكرت ..والمياه أمانة فى ايدينا ..

ياعمو دا دول 10 دقايق تذكرة التراويح ..

حاجة مركزة وموضوع واحد يبقى فى الأثر ..ربنا يرضى عنك ..

تقريبا هبعتله ورقه بهذا الطلب

.....د.على الصلابى ..د. أسامة الصلابى

..د.عبد الوهاب الطريرى ..أ.عبد العزيز القرشى ..د.عائض القرنى ....

خماسية مغرب رمضان

..د.عبد الوهاب ود.أسامة فى شجون الحديث ..الإثنان سويا .."حاجة عسولة "

طول حياتى بحتقر الأشياء الليبية بسبب مخرب القذافى ..

أول مرة يتغير إحساسى تجاه ليبيا ..شغالين برضه ..

شكرا لد.على ود. أسامة

..أ.عبد العزيز ود.عائض ..يرضيان نفسيتى الشعرية جداااااااااااااا ....

د.على ومشاهد الرسول ..ماما مش بتحب أسلوب د.على خالص ..

لكن أنا بستمتع بالبرنامج جدا ..

هيتولع فيا قريب ..لصالح د.على جمعة ..زميل المهنة بتاع ماما ..

حد يتفرج على على جمعة فى رمضان ..ظلم والله ..

صحيح

شجون الحديث على المجد ..

سوق عكاظ ومشاهد الرسول على دليل ....

مدرسة الحب بتفرج عليه بنظام حلقة عندى و5 حلقات عندكم ..

مش قادرة أتابعه ابدا ..الوقت مش مزبط ..

..الأقصى مش عندنا !!!ماليش دعوة عايزة أتفرج على تراويح غزة ..حد يبعتلى رابط ..

..

....

حالة حنين غير معتادة تنتابنى تجاه مصر التى أعتزم مغادرتها بعد قرابة الشهر ..إن شاء الله ..

ليقل الجميع مايشاؤن ..

لكننى باستثناء أيام الحرم وجدت روحى فى مصر ..

على شاطئ النيل ..

فى المزاح مع رفيقات دربى فى الكلية ..

فى فتيات ينشدن "الفجر الباسم قادم "

قضيت بها أحلى رمضانات حياتى ..

ياريت البناتيت حبايبى بتوع الفيسبوك والريل لايف يشرفونى بزيارة قبل ما اسافر ..

مش هبقى ندلة وانتو تبقوا أندال ....

حد فينا يتنازل ..

عارفين نفسهم طبعا الحلوين دول ....

..

فى أنشودة معلقة معايا قوى ..كنت ميتا لأبو على ..رغم انها عن التفحيط وآثاره المدمرة !!!

مش لاقية رابط لام بى ثرى كتر اللى كنت بستخدمه عشان أشيل الحاجة اللى مش عاجبانى فيه ..

النسخة القديمة لو حد هيتكرم ...

..

الجماعة

شفت حلقة واحدة تحت تأثير الإكتشاف

رغم إن المسلسلات ورمضان عندى "لامساس "

كانت حلقة الإمام وهو فى الإسماعيلية أول مابدأ الدعوة

..عارفين ..لا سيناريو وحيد حامد ..ولا تمثيل عزت الوطايطى هو ما أتخوف منه ..

قبل 3 سنين شفت مسلسل ابناء الرشيد ..ومازلت تحت تأثير أداء "إياد نصار " للمأمون ..

ممثل مبدع بحق ..

وطبعا سحر وحيد حامد هينقلب على دماغه والناس هتعجب جدا بشخصية الإمام

....يا إخوان الأردن ..

حد ياخد الراجل ده دعوة فردية عشان خاطر الدعوة ......

..

النتيجة ..

نتيجة الليسانس مابانتش رسميا لللآن ..

وانا بدفع تمن كونى بنت أعضاء هيئة تدريس ..

معرفش النتيجة لغاية دلوقتى ..

أسألكم الدعاء بشدة ..

..

رجاء ..بركة رمضان ..

ادعولى بها ..